Rewan::رێوان

ھیچ شتێک نامان وەستێنێت

2015-06-27

رێوان

(737) جار بینراوە

ئێڤار ئیبراھیم

ھەرگیز نەبوە و نابێت ھەڕەشەکردن و تۆقاندن بەر لە کاروانی ئازادی و دیموکراسی بگرێت.

ھەڕەشە کردن لە ھاوڕێمان ( کاک ئەبوبکر ھەڵەدنی ) بە ژمارە تێلی جیاوازی کۆڕەک ھەڕەشە کردنە لە کۆی پرۆسەی ئازادی و دیموکراسی و سەروەری یاسا لە ھەرێمی کوردستان و ئیرادەی کۆمەڵانی خەڵکی کوردستان کە ھیچ ئەنجامێکیش نادات بەدەستەوە، پێویستە ئەو ھەڕەشانە بە جدی وەربگیرێن و ھەڵوێستەیان لەسەر بکرێت.

زیاتر ئەوانەی کە ھەڕەشە دەکەن و چاو سوردەکەنەوە کەسانی دۆڕاو شکست خواردون لە کۆمەڵگادا، بەرامبەر بە ئازادی و پرەنسیپەکانی دیموکراسی و یاسا، ھیچ شتێکیان لەدەست نایە لە لاوازی خۆیان ھەڵدەستن بە ئەنجامدانی ھەڕەشە، وەکو ئەوە وایە بەری خۆر بە بێژینگ بگرن، بیرتان چوە کە ئەو کاروانەی کە بۆ خۆر دەڕوانێت ئەگەر ھەوڵبدات و نەوەستێت ھەر دەگاتە خۆر، بۆیە بە ھەڵەداچون و ھیچ بەربەستێک ئێمە سارد ناکاتەوە ناوەستین بەردەوام دەبین تا ئەو شوێنەی میللەت دەگەیەنینە کەناری ئارامی دیموکراسی و ئازادی، ئیتر باواز لەو ئەقڵیەتیە فاشلە دواکەوتوە بێنین و یەكتر قبوڵکردن بێنینە کایەوە.

لە بری ئەوە لایەنەکان پەرلەمان بکەن بە مەرجەعی یەکلاکردنەوەی کێشەو مللانێکان، بەتایبەتی ئەوانەی کە رەھەندی نیشتمانیان ھەیە و چارەنوس سازن، یان ھەوڵبدەن لە رێگەی گفتوگۆ و لێکگەیشتن بگەن بە رێکەوتن و چارەسەر،چونکە ئەو ھەڕەشانە بە ھەر بیانویەک بێت دواماندەخات و دەمانگەڕێنێتەوە بۆ سەردەمێکی تاریک و تونێڵێکی تەسک .

داوا لە لایەنە پەیوەندیدارەکان دەکەم ھەوڵی جدی بدەن بۆ دۆزینەوەی ئەو کەسانەی بەو کارە ھەڵساون.

ئەندامی پەرلەمانی کوردستان

٢٥/٦/٢٠١٥