وێنە : وەرگیراوە
كوشتنی خێزانێكی كورد لە بەغداد شەوی رابردوو لەلایەن چەند چەكدارێك، نیگەرانی زۆری لێكەوتەوە ریزان شێخ دلێرئەندام پەرلەمانی یەكێتی نیشتمانی كوردستان لە بەغداد رایگەیاند" كوشتنی خێزانە كوردەكەی بەغداد تاوانێكی سەخت و ترسناكە دەمانگێرێتەوە بۆدۆخی شەڕی تایفی و جارێكی تر میلیشا چەكدارەكان دەستیان كردۆتەوە بە تیرۆر لەپایتەخت كە لەئیستادا ئەو میلیشیایانە دەستیان بەسەرداگرتووە".
پەرلەمانتارەكەی فیدراسیۆنی سەوز ئەمرۆ چوارشەممە رێكەوتی 16/9/2020 لە لێدوانێكی دا بۆ ریوان وتی "كوشتنی دارا رەوف و هاوژینەكەی و كچە تاقانەكەی تاوانێكی دڕندانەیەو ئاماژەیەكی ترسناكە كە میلیشیا چەكدارەكان خەڵكی سیڤیل وچالاكوانان دەكەنە ئامانج و پێشتریش كۆمەڵێك لە چالاكوانان بەهەمان شێوە لە بەغداد كوژراون، ئەو میلیشیایانە جیاوازی ناكەن لە كوشتنی خەڵكی مەدەنی وئازادیخواز بەكورد و عەرەبەوە ئەوان ئەجێندای دەرەكی جێبەجێ دەكەن".
ڕووداوەكەی گەڕەكی مەنسور لە بەغداد دوێنی شەو 15/9 كە بە كوشتنی دارا رەوف وهاوژینەكەی عالیە رەشید نەجم و كچە تاقانەكەی شیلان دارا كۆتای هات نیگەرانی زۆری لێكەوتەوە لەسەر ئاستی فەرمی د. بەشیر حەداد جێگری سەرۆكی ئەنجومەنی نوێنەرانی ئێراق لەبەیاننامەیەكدا ئەمڕۆ بەتوندی ئیدانەی ئەو تاوانە دەكات و داوا لەبەرپرسانی ئەمنی بەغداد دەكات پەلەبكات لەدەستگیركردنی تاوانباران و بەسزاگەیاندنیان.
سەبارەت بە ودەنگۆیانەی باس لە سەربڕینی دارا رەئۆف و دەستدرێژیكردنە سەر شیلانی كچی و بڕینی هەردوقاچی وتی"لێكۆڵینەوە بەردەوامە ودوای راپۆرتی پزیشكی داد بۆمان دەرەكەوێت راستی كوشتنەكە چۆن بووە" .
دارا رەئوف و خێزانەكەی چەندین ساڵە دانیشتوی گەرەكی مەنسورن لەبەغداد و شیلان دارای كچی دكتۆری دەرمانسازیی وچالاكوانی مەدەنی بووە و بەشداری لە خۆپیشاندانەكانی تشرینی رابردووی بەغداد كردووە كاری فریاكەوتن و چارەسەری بریندارەكانی كردووە هەربۆیە شەقامی عەرەبی لەبەغداد كوشتنی خۆی و خێزانەكەی بۆ ئەم كارە دەگەڕێننەوە.
لەئیستادا لێكۆڵینەوەكانی تایبەت بەم تاوانە بەردەوامە و هیچ كام لەو تاوانبارانەش نەدۆزراونەتەوە بڕیار وایە ئەم ئێوارەیە تەرمی ئەم خانەوادەیە لەگۆری سەیوانی شاری سلێمانی بەخاك بسپێردرێن.
